မလေးရှားနိုင်ငံတွင် အလုပ်လုပ်ကိုင်နေသည့်ရခိုင်လူငယ်တစ်ဦးသည် ကွမ်းစားရင်း စကားပြောနေစဉ် လေပြွန်ပိတ်ကာသေဆုံးသွားကြောင်း သိ၇သည်။

သေဆုံးသူမှာ ရခိုင်ပြည်နယ်၊စစ်တွေမြို့နယ်၊ အောင်တိုင်ကျေးရွာမှ အသက် ၂၇ နှစ်အရွယ် ကိုမိုးဒီ(ခေါ်)ကိုမောင်မောင်ထွန်းဖြစ်သည်ဟု မြန်မာလူမှုကူညီရေး(မလေးရှား)အသင်းကထုတ်ပြန်ဖော်ပြထားသည်။

သူသည် မလေးရှားနိုင်ငံ၊ကလန်းမြို့တွင် နေထိုင်ပြီး ပြီးခဲ့သည့် အောက်တိုဘာ ၁၂ ရက်က အလုပ်မှအပြန်ကွမ်းယာစားပြီး သူငယ်ချင်းများနှင့် စကားပြောနေစဉ် လေပြွန်ပိတ်မှု ဖြစ်ပွားခဲ့သည့်အတွက်ကလန်းမြို့ဆေးရုံကြီးသို့ ပို့ဆောင်စဉ် သေဆုံးခဲ့ခြင်းဖြစ်ကြောင်းထုတ်ပြန်ချက်တွင် ဖော်ပြထားသည်။

ယခုလို မသေသင့်ဘဲသေသွားရသည့်အတွက်စိတ်မကောင်းဖြစ်မိပြီး ကွမ်းစားသူများလည်း သတိထားရန်လိုအပ်သည်ဟုမလေးရှားနိုင်ငံ၊ ပါဟန်းပြည်နယ်၊ ဗန်တုန်းမြို့နယ်တွင်အလုပ်လုပ်ကိုင်နေသူရခိုင်အမျိုးသား ကိုဇော်ဇော်ထွန်းက နိရဥ္စရာကို ပြောသည်။

"ခုလိုပြည်တွင်းမှာဝမ်းရေးခက်ခဲလို့ပြည်ပကို လာရောက်လုပ်ကိုင်စားသောက်နေရတဲ့အချိန်မှာ ခုလိုသေသွားတဲ့အတွက်စိတ်မကောင်းပါဘူး။ ကွမ်းစားတတ်တဲ့သူတွေလည်း သတိထားသင့်ပါတယ်"ဟု ပြောသည်။

သေဆုံးသူ၏ရုပ်အလောင်းကို အောက်တိုဘာ(၁၄)ရက်၊ နေ့လယ် (၂)နာရီတွင် မလေးရှားနိုင်ငံ၊ ရှားလမ်းမြို့ရှိ BlissGarden ချဲရပ်သုသာန်၌ မီးသင်္ဂြိုလ်လိုက်ပြီဖြစ်ကြောင်းသိ၇သည်။ (NN-11)

ဓာတ်ပုံ -မြန်မာလူမှုကူညီရေးအသင်း မလေးရှား